IV FESTA DO MAGOSTO
Queridas
familias, dende a Xunta Directiva da APA un ano mais queremos festexar a
fermosa tradición do MAGOSTO e convidámosvos a facer entre todos unha xuntanza
para papar unhas castañas, xogar, escoitar algo de música e estar un anaco de
leria. O Magosto terá lugar o sábado, 17 de outubro, de 17,30 h a 20,30
h, na parte superior do colexio,
concretamente, no espazo do patio de columnas. A entrada farase por enriba do Colexio (pola zona da guardería).
Aconsellamos aparcar na Universidade.
Contaremos como en anos anteriores cos nosos
amigos de Feans, para asar as castañas nun asadeiro feito con
material de refugallo… ¡non volo podedes perder!
Quen
queira pode traer xantares ou doces feitos na casa para partillar, e que leven,
a poder ser, algún ingrediente propio do tempo no que estamos, aínda que non é
requisito necesario. Os máis mañosos
tamén podedes traer colares e figuriñas de castañas para armar unha mostra de zonchos e creacións artísticas.
Ese día
vestide calzado e roupa cómoda porque profesores, pais e avós imos xogar cos
nosos fillos e netos ao fútbol, brilé e aos xogos
populares de sempre. Lembrade os vosos tempos da
infancia para poder ensinarlles a facer bailar as buxainas; darlle á comba ou
soster a goma; poderemos facer equipo con eles nunha carreira de tres pés ou de
sacos, axudárlles a manter o equilibrio sobre os zancos ou brincar á mariola;
demostrarlles as nosas habilidades coa ra, os aros ou a chave,… en definitiva,
vide preparados porque imos disfrutar a reo cos nosos cativos dunha tarde de
xolda.
Para a
boa organización desta actividade axudaríanos ter unha aproximación da xente
que ides asistir. Podedes
apuntarvos no formulario adxunto.
Agardamos
que vos preste esta actividade e quedamos a vosa disposición para calquera
dúbida no correo electrónico da Asociación de Pais (apajesuitinas@hotmail.com).
Comentarios
Publicar un comentario
La publicación de los comentarios esta sujeta a la decisión del administrador.